ni Gregorio V. Bituin Jr.
15 pantig bawat taludtod
kaharap ang mga estudyante ng Catbalogan
si Meyor Steph, Dingdong, Climate Walkers, lingkodbayan
pati na mga kabataang may bagong samahan
kanang kamay ay itinaas, tanda’y katapatan
at sabay kaming nanumpa para sa kalikasan
si Naderev "Comm. Yeb" Saño ng Climate Change Commission
ang nangunang nagsalita sa panunumpang iyon
ang bawat salita niya sa bawat isa'y hamon
ang bawat kataga sa mga isyu'y tumutugon
bawat lumabas sa bibig ay isang inspirasyon
bawat pangungusap ay tila isang paglalagom
animo'y saulado niya ang kanyang winika
tandang isang pantas sa pangkapaligirang gawa
hinggil sa kalikasan yaong kanyang sinalita
para sa mamamayan upang mundo'y maunawa
hinggil sa Climate Justice upang mundo'y makalinga
para sa lahat upang magsikilos tayong kusa
salamat, Comm. Yeb, sa panunumpang makahulugan
sa pagtupad sa pinanumpaan, kami'y asahan
- sa Samar State University, habang isinasawa ang Climate Change Congress at launching ng National Youth Commission (NYC) Policy Advisory Campaign on Climate Change and DRR Youth Participation, Lungsod ng Catbalogan, Nobyembre 3, 2014
Walang komento:
Mag-post ng isang Komento