TEAMWORK AT ANG CLIMATE WALK
ni Gregorio V. Bituin Jr.
15 pantig bawat taludtod
matapos ang lakad, naglaro kami ng basketbol
tila di kami pagod, sa bola'y panay ang habol
kita ang saya't pagkakaisa sa bawat isa
mahusay ang teamwork, pati bola'y nakikisama
animo'y sinasabing kung tayo'y magtutulungan
maraming magagawa't problema'y malulunasan
tulad din ng ipinakitang teamwork sa Climate Walk
sa laro nga'y nakita ang tamang labas at pasok
paano ang teamwork sa pandaigdigang usapin
lalo't climate change na itong kinakaharap natin
sapat ba ang paglinang at pagtatanim ng puno
sapat din ba ang ginagawa ng mga pinuno
ng bawat bansa upang Yolanda'y di na maulit
upang mapigilan ang gayong bagyong sakdal-lupit
kailangan ng teamwork sa paghanap ng solusyon
kung paanong may teamwork din ang pagrerebolusyon
- sa Jesse Robledo Coliseum sa Naga City, Oktubre 18, 2014
Walang komento:
Mag-post ng isang Komento